Mesi drejt El Klasikos

Numri 10 i Barcelonës synon të thyejë disa rekorde në këtë sezon

Legjendës holandeze iu deshën 5 sezone për të arritur në 60 gola për skuadrën “blaugrana”, ndërsa legjendës argjentinasi i mjaftoi vetëm një, madje ende jo i plotë. Lionel Mesi ka shënuar në 2011-2012 aq gola sa Johan Krujf shënoi në 5 vite të kaluara në “Kamp Nou”, ndërsa historia e numrit 10 nuk ka përfunduar ende.
Ndërkaq, gazeta e Madridit, “Marka”, parashikon që Leo të mund të thyejë një tjetër rekord dhe këtë pikërisht në ndeshjen ndaj Realit në “Kamp Nou”. Bëhet fjalë për rekordin e shënimit të golave në një edicion të vetëm që mbahet nga Gerd Myler, me 67 në 1972-1973.
Me mesataret e shënimit, Mesi do të synojë të arrijë tek shifra 68 pikërisht në “El Klasikon” e radhës në kampionat. Në dispozicion të yllit janë 7 ndeshje në kampionat, 1 në Kupën e Mbretit dhe 2 deri në 3 në Champions.
Me dy golat e shënuar ndaj Saragozës, Lionel barazoi 38 golat e shënuar në një kampionat nga Zarra më 1950-1951 dhe Hugo Sançez më 1989-1990, ndërsa është vetëm 2 gola nga rekordi i vjetshëm i Kristiano Ronaldos. Veçse, duhet thënë se në këtë synim, në garë është edhe Ronaldo që ka shënuar 37 gola në këtë kampionat.
Po ashtu, objektiv i Mesit është tejkalimi i rekordit të Hoze Altafinit për golat e shënuar në kupën e kampionëve. Altafini shënoi 14 gola për Milanin në 1962-1963, ndërsa Mesi ka shënuar po 14 deri tani dhe ka dy gjysmëfinalet ndaj Çelsit si dhe një finale të mundshme për ta thyer edhe këtë rekord.


Nuk ka komente

Bëhu komentuesi i parë!

Komentoni