Thaçit i refuzohen 27 kërkesa për vizita

Kryeministrit të Republikës së Kosovës, Hashim Thaçi, i janë refuzuar njëzeteshtatë (27) kërkesa për vizita në vende të ndryshme dhe takime me burrështetas të ndryshëm.

Kështu shkruan gazeta gjermane “Der Tagesspigel” në një artikull të gjatë për Kosovën, në të cilin shtetin më të ri në Ballkan e paraqet si vend me probleme të shumta dhe me qeveri të korruptuar.

Sipas kësaj gazete prestigjioze, vizitat nga shtetet e ndryshme janë refuzuar për shkak të dyshimeve se i pari i Qeverisë së Kosovës është i përlyer në krim të organizuar.

“Njëzet e shtatë kërkesa ka bërë Qeveria e Kosovës, por të gjitha janë hedhur poshtë”, thuhet në artikullin, të cilin gazetarët gjermanë e kanë realizuar pasi kanë qëndruar disa ditë në Kosovë.

Për qeveritarët e Kosovës duket i parëndësishëm ky artikull. Zv/kryeministri i Kosovës, Hajredin Kuçi, të mërkurën ka refuzuar ta komentojë artikullin në fjalë.

“Nuk e kam lexuar. Meqenëse nuk e kam lexuar, nuk mundem as ta komentoj”, ka thënë shkurt Kuçi.

Ndërkaq, për anëtarët e partive opozitare artikulli i gazetave gjermane paraqet anën e “padukshme” të Qeverisë së Kosovës, dhe izolimin ndërkombëtar në të cilin, sipas tyre, ndodhet vendi.


Nuk ka komente

Bëhu komentuesi i parë!

Komentoni