Mijëra banorë të Gostivarit dhe rajoneve të tjera përreth përcollën sot për në banesën e fundit dy të rinjtë nga Gostivari, 26 vjeçarin Besnik Shehapi dhe 30 vjecarin Imran Mehmeti, të cilët u vranë dje nga polici Jakim Trifunovski. Varrimi i tyre u bë pasditen e sotme, duke filluar nga Xhamia e lagjes për tek varrezat e qytetit. Gjatë gjithë rrugës, tërë xhemati përcolli kufomat me tekbir. Në varrim morëm pjesë edhe krerët e RDK-së Rufi Osmani, PDSH-së Menduh Thaçi, ministri i pushtetit vendor Nevzat Bejta si dhe personalitete të tjera nga jeta politike. Pas lutjes së fundit që u bë nga hoxhallarët, me një referat dy shokëve të tyre iu drejtua edhe dega e Aleancës Kuq e Zi e Gostivarit, e cila dënoi këtë akt mizor.
“Me hidhërim të thellë sot jo vetëm qytetarët e Pollogut por të gjithë viset shqiptare bashkohen me dhimbjen për humbjen e dy vëllezërve tanë. Më tej duke shprehur hidhërimin e madh për humbjen e dy vëllezërve tanë në letrat ngushëlluese thuhet se në këto moment të dhimbjes së madhe jemi pranë jush dhe ju sigurojmë se të tronditur nga tragjedia vajzat dhe djemtë kuq e zi nuk do të rijnë pa kërkuar llogari deri sa të vendoset drejtësia dhe fajtori të marr dënimin e merituar”,deklaroi Egzon Azizi, Aleanca Kuq e Zi-Gostivar.
Dy të rinjtë Shehabi dhe Mehmeti u vranë një ditë më parë, nga polici Trifunovski.
