Vetëvendosje publikon “listën e zezë” të importuesve nga Serbia

VV do ta thërras në interpelancë Mimoza Kusari-Lila

http://www.botasot.info/img/VETEVENDOSJE.jpgLëvizja Vetëvendosje do ta parashtrojë nesër një kërkesë për interpelancë të re, ku do ta ftojë ministren e Tregtisë dhe Industrisë, Mimoza Kusari – Lila për të diskutuar për çështjen e reciprocitetit dhe tregtinë me Serbinë, dhe në atë interpelancë do të kërkojë që të votohet mocioni, i cili kërkon që të kthehen masat e reciprocitetit ndaj Serbisë.

Një gjë të tillë e kanë bërë të ditur drejtues të kësaj lëvizje të hënën në një konferencë për media, me ç’rast kanë publikuar edhe një listë prej 25 kompanish nga Kosova, të cilat importojnë mallra nga Serbia nga heqja e masës së reciprocitetit me Serbinë.

Kjo listë e kompanive importuese nis me Elkosin, pronar i së cilës është deputeti i Aleancës për Ardhmërinë e Kosovës, Ramiz Kelmendi, dhe e cila që nga heqja e masave të reciprocitetit, deri në fund të tetorit ka importuar mall nga Serbia në vlerë prej 4 milionë e 350 mijë eurosh.

Pas Elkosit, lista pastaj vazhdon me kompanitë e ndryshme si Potera – BB, Progresi, Malësia commerce, Coca-Cola, M&Sillosi, Bast-Trade, Migros Commerce, Buçaj, Aroma, Euro Coop, Agrounion, Termo X, Eng Office, Niti-Tiki Company, Llap-com, As Company, Exlusiv, Elita, Bleta, Dula, Vetoni, Meridian Corporation, Pagarusha dhe Gëzimi.

Shuma e përgjithshme e mallrave që këto kompani i kanë importuar nga Serbia nga mesi i shtatorit deri në fund të tetorit, sipas listës së Vetëvendosjes, sillet rreth 20 milionë euro.

Qëllimi i publikimit të këtyre kompanive, sipas nënkryetarit të Vetëvendosjes, është që të informohen qytetarët kush janë këto biznese, të cilat përfitojnë në padrejtësinë që po u bëhet qytetarëve të Kosovës.

“Mendojmë se së paku ajo që ne ua kemi borxh si Lëvizje Vetëvendosje si gjithmonë edhe më herët qytetarëve të Kosovës, është që t’u japim informata, që ta dinë, që të jenë të informuar, kush janë ato biznese, të cilat po e financojnë në një mënyrë ose një tjetër, funksionimin e strukturave ilegale të Serbisë në Kosovë”, ka thënë Ahmeti.

Ai ka thënë se kjo është vetëm një listë me emrat e disa kompanive, ngase do të ketë edhe emra të tjerë të kompanive shqiptare që importojnë nga Serbia, e të cilat do të bëhen publike.

Fajtor për këtë vërshim të tregut të Kosovës nga mallrat e Serbisë, sipas deputetit të Vetëvendosjes, Visar Ymeri, është politika, por bashkë me të edhe pronarët e bizneseve.

“Një gjë tjetër që është e rëndësishme, është që në këtë mes shihen edhe tregtarë, që janë biznismenët më të fuqishëm në Kosovë dhe në një mënyrë përmes depove në Kosovë e kanë monopolizuar me të madhe tregun me shumicë dhe pakicë, dhe këta nëse janë importuesit më të mëdhenj nga Serbia, sic është rasti me Elkos-in, atëherë në një mënyrë kjo ua kushtëzon edhe shitoreve të vogla që edhe ata doemos të shesin produkte nga Serbia, për shkak se nuk kanë mundësinë që të marrin produkte tjera nga depotë ku furnizohen. Fakteqësisht ky është rasti me Elkosin, i cili e ka një pjesë të madhe të depove me shumicë, ku i furnizon edhe shitoret tjera me pakicë”, ka thënë Ymeri.

Ai ka rikujtuar se vendosja e masës së reciprocitetit në korrik është parë se i shkakton dëme Serbisë në njërën anë dhe është shumë e dobishme për ekonominë e Kosovës. Andaj, duke pasur parasysh këtë, Ymeri ka thënë se Lëvizja Vetëvendosje nesër do të kërkojë interpelancë të ministres së Tregtisë, Mimoza Kusari-Lila, ndërkaq po ashtu do të paraqes një mocion, përmes të cilit do të kërkojë kthimin e masës së reciprocitetit.

Drejtuesit e Vetëvendosjes kanë kritikuar qasjen e Qeverisë së Kosovës karshi Serbisë, duke thënë se derisa Serbia po sillet si një palë e hidhëruar nga Kosova, kjo e fundit po sillet si një mik, i cili dëshiron me çdo kusht të pajtohet me Serbinë, duke ia dhënë të gjitha beneficionet, vetëm e vetëm që ajo të kthehet në tavolinë.

Kjo, sipas tyre, nuk mund të shihet ndryshe, përveç si një dëshirë e Qeverisë, në mënyrë të veçantë e kryeministrit Thaçi që përmes kësaj “miqësie” në në kurriz të qytetarëve të Kosovës, të gjejë një rrugë të vogël për vete në Evropë.


Nuk ka komente

Bëhu komentuesi i parë!

Komentoni