Drenas, 19 maj 2025 – Një kapitull i rëndësishëm në futbollin kosovar mbyllet me tërheqjen nga skena e futbollit profesionist të Lapidar Lladrovcit, futbollistit të njohur dhe shumë të dashur për publikun. Ai është përshëndetur me nderime, mirënjohje dhe emocione të shumta nga bashkëlojtarët, tifozët dhe më së shumti, nga familja e tij.
Në një status prekës në Facebook, babai i tij, Ramiz Lladrovci – Kryetar i Komunës së Drenasit dhe ish-komandant i Ushtrisë Çlirimtare të Kosovës – ka ndarë me publikun ndjenjat dhe krenarinë e thellë për djalin e tij, që për vite të tëra dha gjithçka në fushën e gjelbër dhe jashtë saj.
“Lapidar, faleminderit për emocionet që na i solle, në fushë dhe jashtë saj!” – kështu nis letra emocionale e Lladrovcit, ku përmendet përkushtimi, modestia dhe profesionalizmi i Lapidarit në çdo etapë të karrierës së tij.
Ai kujton me dashuri dhe krenari rrugëtimin e birit të tij që nisi në klubin Haar, afër Mynihut, për të vazhduar me skuadra si Prishtina, Drenica, Feronikeli, Kukësi, Trepça ’89 dhe për t’u rikthyer sërish tek Feronikeli – klubi që tashmë do ta mbajë mend përgjithmonë si një nga legjendat e tij.
Në këtë përshëndetje publike, Ramiz Lladrovci përkujton edhe dy mbështetësit më besnik të Lapidarit – prindërit e tij, Tush dhe Ki, që ndonëse nuk ishin fizikisht të pranishëm në këtë moment të rëndësishëm, mbeten të përjetshëm në kujtesën dhe dashurinë e familjes dhe të birit të tyre.
Lladrovci thekson se pavarësisht pensionimit, beson fort që Lapidari ka ende shumë për të dhënë – veçanërisht për brezat e rinj, përmes përvojës, shpirtit të garës dhe vlerave të pastërta që ai përfaqësoi në çdo hap të karrierës së tij.
Kujtimet nga netët pa gjumë, emocionet e trofeve të fituar dhe krenaria për rrugën që ka ndjekur, janë pjesë e trashëgimisë që Lapidar Lladrovci lë pas si sportist, shok, prind dhe bir shembullor.
“Të duam Lapidar! Faleminderit për gjithçka që na ofrove!” – përmbyllet statusi i Ramiz Lladrovcit, i cili nuk flet vetëm në emër të familjes, por edhe në emër të gjithë atyre që për vite të tëra kanë ndjekur dhe mbështetur rrugëtimin e Lapidarit.
Në fund të një karriere të gjatë dhe të suksesshme, Lapidar Lladrovci largohet nga fusha me kokën lart dhe me duart e mbushura me përvojë dhe respekt – gati për kapitullin e radhës në jetën dhe futbollin kosovar.
