Sulmuesi argjentinas në radhët e Real Madridit, Gonzalo Higuain ka qenë në qendër të vëmendjes së mediave në muajin e kaluar, pasi për shërbimet e tij ishte i interesuar presidenti i Çelsit, Roman Abramoviç.
Megjithatë, Reali refuzoi 40 milionë eurot e Çelsit, derisa tash Higuain ka bërë të ditur se nuk do të largohet nga “klubi mbretëror” derisa ta fitojë Ligën e Kampionëve. “Derisa të mos fitojmë Ligën e Kampionëve nuk shkoj askund!”, ka theksuar Higuain. Ai ka thënë se ndjen një mbështetje të madhe të klubit madrilen. “Kur iu nënshtrova operimit të shpinës, presidenti Florentino Perez ishte përkrah meje”, ka shtuar sulmuesi argjentinas. Higuain ka shënuar 94 gola në pesë edicionet e deritashme në fanellën e Realit.
