Sikurse pritej, humbja 3-0 në shtëpi me Izraelin ka lënë pasoja të tjera për Kombëtaren e futbollit, që humbet dy pozicione në renditjen e FIFA-s.
Në klasifikimin e përmuajshëm të publikuar sot nga “qeveria” e futbollit në ueb-faqen e vet zyrtare (“Fifa.com”), kuqezinjtë mbajnë vendin e 49-të. Skuadra jonë ka 618 pikë, një më pak se muajin paraardhës, dhe e sheh veten midis Australisë dhe Burkina Fasos
Ndërkohë, Kosova humbet një pozicion dhe zbret në vendin e 165-të.
Nga kundërshtarët në grupin kualifikues për Botërorin 2018, më lart se Shqipëria renditen vetëm Spanja (10) e Italia, që zbret 3 shkallë dhe pozicionohet e 16-ta. Izraeli, edhe pse ka fituar plot 25 pozicione, gjendet në vendin e 54-t, ndërsa më pas vijnë Maqedonia e 162-ta (-7) dhe Lihtenshtejni i 189-ti (-6).
Sa i takon kreut, Argjentina vazhdon të jetë e para, e ndjekur nga Brazili që parakalon Gjermaninë në vendin e tretë. Kili ngjit dy shkallë dhe shkon i katërti, duke zbritur Belgjikën dhe Kolumbinë në pozitat 5 dhe 6. Katër vendet e tjera që plotësojnë dhjetëshen janë njëlloj si muajin e kaluar: Franca, Portugalia, Uruguai dhe Spanja.
