Policia e Kosovës ka treguar se pika kufitare në Merdare vazhdon të jetë e mbyllur, duke kërkuar nga bashkatdhetarët që të shfytëzojnë pikëkalime të tjera për të ardhur në Kosovë.
Mbyllja vijon pasi serbët brenda Serbisë vedosën një barrikadë duke e parandaluar lëvizjen e lirë.
“Në orët e vona të mbrëmjes së datës 27.12.2022, bazuar në informacionet e siguruara, nga persona të dyshuar është bllokuar rruga në territorin e Serbisë që e lidhë me Republikën e Kosovës”, thuhet në njoftim.
Barrikada ndodhet në kilometrin e dytë larg vijës-kufitare.
“Bllokimi rrugës është bërë afërsisht në kilometrin e dytë në territorin e Serbisë, nga pika kufitare “Merdare” e cila për shkak të kësaj bllokade është mbyllur për qarkullim”.
“Një bllokim i tillë i kundërligjshëm ka pamundësuar lëvizjen dhe qarkullimin e lirë të njerëzve dhe mallrave, andaj ftojmë qytetarët dhe bashkatdhetarët tanë që të shfrytëzojnë pikat e tjera kufitare për qarkullim, duke përjashtuar pikat kufitare “Jarinje”, ”Bernjak” dhe “Merdare”, deri në njoftimin e radhës”, përmbyllet komunikata e Policisë.
Në anën tjetër, të mërkurën Ministria e Punëve të Jashtme dhe Diasporës ka kërkuar nga bashkatdhetarët të cilët vijnë në Kosovë përmes Serbisë që ta shmangin këtë pikë-kalimi.
