Komisioni Qendror i Zgjedhjeve, ka njoftuar se iniciativa për largimin e kryetarëve në veri ka dështuar për shkak se nuk kanë votuar aq qytetarë sa kërkon ligji.
Kryetari Kreshnik Radoniqi, i ka treguar statistikat e votimit në katër komunat veriore:
- Në komunën e Leposaviqit kanë votuar 124 votues nga 13,674 apo 0.91%;
- Në komunën e Zubin Potokut kanë votuar 18 votues nga 6,877 apo 0.26%;
- Në komunën e Zveçanit nuk ka votuar asnjë votues nga 7,209 pra kemi 0%;
- Në komunën e Mitrovicës së Veriut kanë votuar 111 votues nga 18,796 apo 0.59%.
Ai njoftoi se nuk është përmbushur kriteri ligjor për shkarkimin e kryetarëve.
“Duke u mbështetur në të dhënat e daljes së votuesve në këtë proces ju njoftojmë se nuk kanë votuar shumica e votuesve të regjistruar siç kërkohet me nenin 72 të Ligjit për Vetëqeversjen Lokale në Republikën e Kosovës, pra nuk është arritur 50% i domosdoshëm, andaj konstatojmë se iniciativa qytetare për largimin e kryetarëve të komunave Leposaviq, Zubin Potok, Zveçan dhe Mitrovicë e Veriut ka dështuar”, tha ai.
Erden Atiq, Ilir Peci, Lulzim Hetemi e Izmir Zeqirit do vazhdojnë të jenë në krye të komunave përkatëse.
Shumica dërrmuese e qytetarëve në veri të vendit e kanë bojkotuar votimin për shkarkimin e kryetarëve. Para se të organizohej ky votim, Lista Serbe u kishte bërë thirrje qytetarëve atje që të bojkotohej procesi.
Ndaj këtij bojkoti ka reaguar presidentja Vjosa Osmani, e cila e ka akuzuar presidentin e Serbisë, Aleksandër Vuçiq që përmes presionit ka ndikuar te serbët lokalë në Kosovë që të mos dalin të votojnë.
