Kryetari i PDK-së, njëherësh ministër i Punëve të Jashtme, para se të fillonte seanca është “kapur” nga mediat, në oborrin e Qeverisë, teksa bisedonte me kryetarin e Mitrovicës Veriore, Goran Rakiq si dhe ministrin e Administratës së Pushtetit Lokal, Lubomir Mariq.
Këshilltari i Thaçit, Ardian Arifaj ka thënë për zerin se zv.kryeministri nuk ka pas në agjendë takim me përfaqësuesit serbë.
“S’kam pas në agjendë asgjë, takimi nuk ka qenë i paraparë s’ka pas”, ka thënë shkurt ai. 
Ndërkohë, shefi i grupit parlamentar nga Lista “Srpska”, Slavko Simic ka konfirmuar se ende nuk janë përcaktuar nëse do ta votojnë apo jo Thaçin president.
Ai nuk e ka hedhur poshtu mundësinë që partia e tij të ketë një kandidatë për president.
“Në ditët e ardhshme do të mbahen disa takime brenda koalicionit dhe natyrisht edhe takimi i grupit parlamentar “Lista serbe”, ku do të marrim vendimin përfundimtar. Nuk përjashtohet mundësia që “Lista serbe” të ketë një kandidat të vetin për President, pasi në këtë mënyrë do të tregohej se Kosova është një shoqëri demokratike dhe pragmatike që është e pranueshme për të gjitha komunitetet”, ka thënë ai.
