Kryeministri Edi Rama deklaroi sot se, Shqipëria ka hyrë në një fazë të re në rrugëtimin e saj drejt anëtarësimit në BE.
Nbë fjalën e tij në samitin BE-Ballkani Perëndimor mbi Planin e Rritjes dhe Konvergjencës me fokus integrimin e Ballkanit Perëndimor drejt Bashkimit Evropian, si edhe zbatimin e Planit të Rritjes për Ballkanin Perëndimor që po mbahet sot në Tiranë, Rama u shpreh se, “sot mblidhemi për të thelluar bashkëpunimin tonë si kombe me mendësi të ngjashme që kërkojnë të bashkohen me bashkimin e shteteve evropiane”.
“Shqipëria ka hyrë në një fazë të re në rrugëtimin e saj drejt anëtarësimit në BE, duke 3- fishuar përpjekjet tona për të arritur këtë objektiv të lartë strategjik”, tha Rama
Së pari, u shpreh kreu i qeverisë, “po ndërmarrim intensivisht me një shpejtësi të re detyrat e nevojshme të shtëpisë që janë kaq të shumta, duke miratuar korpusin ligjor të BE-së, duke thelluar reformat në të gjitha drejtimet dhe duke rritur luftën tonë kundër korrupsionit dhe krimit të organizuar në nivele të reja”.
Së dyti, vijoi Rama, “mbetemi të vendosur për të nxitur përmirësimin e marrëdhënieve tona me të gjithë partnerët tanë rajonalë, duke nxitur paqen, dialogun dhe bashkëpunimin midis vendeve të 6-shes së Ballkanit Perëndimor”.
Së treti, shtoi kreu i qeverisë, “po bashkëpunojmë ngushtë me aleatët tanë të BE-së, duke shkëmbyer pikëpamje për mënyrën sesi të mund të rrisim dhe intensifikojmë këtë përpjekje të përbashkët dhe të përmirësojmë shanset për sukses”.
