Preshevë, 14 prill 2026 – Me krenari dhe emocione të veçanta është bërë e ditur se sot ka dalë nga shtypi monografia “Profesor Ibrahim Kelmendi (1916 – 1979)”, një vepër me rëndësi të madhe shkencore, arsimore dhe kombëtare.
Autori i kësaj monografie është Elez Osmani nga New Yorku (SHBA), ndërsa në realizimin e saj kanë kontribuar edhe emra të njohur të fushës akademike dhe profesionale. Konsulent i projektit ka qenë Idriz Lamaj, redaktor Prof. Dr. Emin Kabashi nga Fushë Kosova, ndërsa recensent Mr. Nehat Hyseni.
Për realizimin teknik të librit janë angazhuar Dr. Besian Hyseni, i cili ka punuar në realizimin kompjuterik dhe kopertinën, si dhe Laura Shulemaja, përgjegjëse për dizajnimin dhe faqosjen. Shtypi është bërë nga LENA Graphics në Prishtinë. 
Ky projekt përfaqëson një kontribut të rëndësishëm në ruajtjen dhe promovimin e figurave të shquara të arsimit dhe historisë kombëtare shqiptare. Autorët dhe bashkëpunëtorët kanë shprehur mirënjohje të thellë për të gjithë ata që kanë ndihmuar në realizimin e kësaj vepre.
Promovimi i parë më 16 prill
Promovimi i parë i monografisë do të mbahet më 16 prill 2026 në Shkollën Fillore në Preshevë, e cila mban me krenari emrin e “Profesor Ibrahim Kelmendi”.
Ky organizim zhvillohet në kuadër të shënimit të 110-vjetorit të lindjes së Profesor Ibrahim Kelmendit, duke i dhënë një dimension të veçantë kësaj ngjarjeje kulturore dhe historike.
