Ministri i Punëve të Jashtme të Serbisë, Marko Gjuriq, ka reaguar pas vendimit të KQZ-së për të mos miratuar shpalljen e rezultatit përfundimtar të zgjedhjeve për Listën Serbe.
Gjuriq e konsideron këtë një shkelje të të drejtave politike të qytetarëve serbë në Kosovë. Ai thekson se ky veprim po ndodh në kohën kur Bashkimi Evropian ka nisur procesin e heqjes së masave ndaj qeverisë së Albin Kurtit.
“Veçanërisht shqetësues është fakti se ky veprim po ndodh pikërisht ndërkohë që BE po fillon heqjen e masave kundër qeverisë së Kurtit, një hap që nuk ka ndihmuar në ndalimin e presioneve mbi serbët dhe komunitetet tjera joserbe dhe as në ruajtjen e standardeve demokratike,” ka shkruar Gjuriq. 
Ai njoftoi se Serbia do të informojë partnerët ndërkombëtarë dhe do të insistojë në respektimin e të drejtave politike të popullit serb në Kosovë.
