Një incident i rëndë ka ndodhur dje, më 19 janar, në oborrin e Qendrës Klinike Universitare të Kosovës (QKUK) në Prishtinë, ku një përleshje mes disa personave është shoqëruar me britma, të shara dhe tension të lartë, duke detyruar Policinë të ndërhyjë menjëherë.
Burime të sigurta nga QKUK bëjnë me dije se incidenti është parë nga persona të pranishëm në atë pjesë të objektit, të cilët kanë dëgjuar britmat dhe fjalosjet, teksa situata ka eskaluar shpejt.
Sipas informacioneve, rreth orës 13:20 zyrtarët policorë të angazhuar në punë sekondare në QKUK janë njoftuar për një përleshje në oborrin e këtij institucioni shëndetësor.
Në vendin e ngjarjes kanë dalë njësitë policore, të cilat kanë shoqëruar në Stacionin Policor personat e përfshirë në rast: të dyshuarin D.G, ankuesin N.P, si dhe dy dëshmitarë, B.P dhe B.R, të cilët kishin tentuar t’i ndanin palët.
Sipas burimeve, përleshja dyshohet se ka ndodhur pasi i dyshuari D.G ka një fëmijë me ish-bashkëshorten B.P, dhe në momentin kur e ka parë atë bashkë me partnerin e saj N.P, dyshohet se e ka sulmuar çiftin.
Si pasojë e incidentit, tretman mjekësor kanë pranuar B.P dhe N.P.
Lidhur me rastin, me urdhër të Prokurorit të Shtetit, rasti është iniciuar si “Dhunë në familje”, ndërsa i dyshuari D.G është dërguar në mbajtje për 48 orë.
Hetimet për zbardhjen e plotë të rrethanave të rastit janë duke vazhduar.
