Jehona Lushaku-Sadriu nga Lidhja Demokratike e Kosovës, ka bërë të qartë se partia e saj nuk ndjen asnjë detyrim politik për t’i siguruar kuorumin apo votën Vjosa Osmanit për një mandat të dytë në krye të shtetit.
Lushaku-Sadriu ka lëshuar kritika të ashpra ndaj Osmanit, duke e akuzuar atë për mungesë të rolit unifikues dhe anshmëri të hapur ndaj pushtetit të Albin Kurtit gjatë pesë viteve të fundit.
Sipas zyrtares së lartë të LDK-së, figura e presidentes nuk ka arritur të qëndrojë mbi palët, siç e kërkon Kushtetuta. 
“Gjatë këtyre pesë viteve kemi parë një presidente që në shumë momente ka qenë e anshme. Presidentja duhet të jetë mbi partitë politike dhe të ketë një rol unifikues e përbashkues. Shpeshherë kemi parë vendime që kanë dhënë efekte dhe anësi politike ndaj partisë që ka qenë në pushtet”, deklaroi ajo.
Për dallim nga viti 2021, kur LDK-ja kishte mundësuar zgjedhjen e Osmanit duke qëndruar në sallë, këtë herë qasja e partisë së Lumir Abdixhikut duket krejtësisht ndryshe.
Lushaku-Sadriu u shpreh se mbështetja nuk është e garantuar dhe se pjesëmarrja në votim do të jetë një qëndrim i pastër politik.
“Ne nuk e shohim si diçka që neve na obligon që të rrimë në sallë e as që t’i japim mbështetje. Ne si deputetë duhet ta kryejmë obligimin tonë duke votuar ose duke marrë një qëndrim politik”, tha Lushaku-Sadriu.
