Prokuroria Speciale ka ndarë detaje për operacionin e arrestimit të Fatmir Shehollit, ish-pjesëtarit të Sigurimit Shtetëror të Serbisë (UDB), të enjten në mëngjes në Prishtinë.
I dyshuari është arrestuar në regjionin e Prishtinës, gjatë një operacioni të asistuar edhe nga Agjencia e Kosovës për Inteligjencë, tha Prokuroria.
Me aktvendim të prokurorit të rastit, i dyshuari është ndaluar për 48 orë. 
Momentalisht, Prokuroria tha se një bastisje po vazhdon në vendbanimin e të dyshuarit.
“Me aktvendim të Prokurorisë Speciale, i dyshuari është ndaluar për 48 orë, dhe nga njësitet relevante të Policisë së Kosovës janë duke u kryer bastisje në vendbanimin e të dyshuarit, me qëllim të sigurimit edhe të provave të tjera materiale”, thuhet në njoftim.
Prokuroria, tha po ashtu se në bashkëpunim dhe koordnim me Policinë e Kosovës është duke ndërmarrë të gjitha veprimet e nevojshme hetimore, në përputhje me Kodin e Procedurës Penale dhe ligjet në fuqi.
