Në një takim të veçantë me mjekët, infermierët dhe punëtorët e shëndetësisë në Gjilan, Arbër Ismajli theksoi rëndësinë e punës së tyre të palodhur dhe përkushtimin ndaj qytetarëve. Ai falënderoi çdo profesionist për sakrificën, përkushtimin dhe shpirtin e tyre të pastër, duke nënvizuar se këta janë njerëzit që mbajnë çdo ditë në këmbë sistemin shëndetësor të qytetit.
“Mantelbardhët kërkojnë më shumë respekt, dinjitet dhe kushte më të mira pune. Ky është zotimi jonë: në Gjilanin e ri, ata do të jenë nga të parët që do të ndiejnë ndryshimin e plotë,” tha Ismajli.
Ai falënderoi stafin e shëndetësisë për mikpritjen dhe besimin që i dhanë, duke theksuar se me përkrahjen e tyre do të kthehet shëndetësia e Gjilanit në një arsye krenarie për qytetin, ku puna e ndershme, dija profesionale dhe dashuria për njeriun do të jenë baza e gjithçkaje. 
“Gjilani ka njerëz të jashtëzakonshëm, dhe mantelbardhët janë disa prej më të mirëve. Shihemi në ditë të mira dhe të bardha për shëndetësinë tonë,” përfundoi Ismajli.
