Kandidati për kryetar të Prishtinës, Uran Ismaili, sot ka mbajtur tubimin në fshatin Barilevë, ku para një numri të madh qytetarësh të kësaj zone prezantoi planin e tij për zhvillimin e fshatit.
Ismaili theksoi se fshatrat e Prishtinës në asnjë qeverisje deri më tani nuk kanë marrë trajtimin e merituar, ndërsa kryetarët e deritanishëm investimet kryesore i kanë përqendruar vetëm në qendër të qytetit. Ai tha se kjo periudhë e qasjes selektive do të marrë fund pas 12 tetorit, kur fshatrat do të trajtohen me dinjitet dhe do të marrin investimet që u takojnë.
“Barileva dhe fshatrat e tjera të Prishtinës kanë potencial bujqësor dhe turistik të pashfrytëzuar, që mund të shndërrohet në burim zhvillimi për komunitetin, por edhe për gjithë kryeqytetin,” tha Ismaili. 
Plani i Ismailit për Barilevën përfshin:
Ndërtimin e sheshit të Barilevës;
Ndërtimin e një çerdheje të re;
Rregullimin e shtratit të lumit me shtigje për vrapim;
Rregullimin e stadiumit të Barilevës;
Dyfishimin e subvencioneve për bujqësi;
Krijimin e fondit për mbrojtjen e bujqve;
Funksionalizimin dhe shtimin e shërbimeve mjekësore në QMF;
Ndriçimin e të gjitha rrugëve dhe hapësirave publike.
Ky tubim në Barilevë vjen si vazhdimësi e prezantimit të planeve që Uran Ismaili ka mbajtur deri më tani në lagjet Ulpianë, Dardani, Bregu i Diellit, Kodra e Trimave, Muhaxherët, Kalabri, Tophane, Matiçan dhe Nazim Gafurri, si dhe në fshatrat Bardhosh dhe Hajvali.
