Prishtinë – 10 shtator 2025 – Komisioni Qeveritar për Persona të Zhdukur ka njoftuar se sot, në orën 10:00, do të zhvillohen inspektime në fshatin Kozhle, afër Novi Pazarit, pas dyshimeve për ekzistencën e një varri masiv.
Ky aktivitet është pjesë e përpjekjeve të vazhdueshme për zbardhjen e fatit të personave të zhdukur gjatë luftës në Kosovë. Inspektimi ishte planifikuar të bëhej edhe vitin e kaluar, por u shty për shkak të pengesave teknike dhe përgatitjeve në terren. 
Në vendngjarje do të marrin pjesë përfaqësues të Delegacionit të Kosovës, Komisionit për Persona të Zhdukur dhe Institutit të Mjekësisë Ligjore, të cilët do të mbledhin prova dhe do të kryejnë verifikimet e nevojshme.
Komisioni ka theksuar se dhimbja e familjeve që prej më shumë se dy dekadash presin lajme për fatin e më të dashurve të tyre mbetet një plagë e hapur e shoqërisë. Çdo hap drejt zbardhjes së së vërtetës shihet si një hap drejt drejtësisë, paqes dhe dinjitetit njerëzor.
