Kryetari i Komunës së Mitrovicës së Jugut, Agim Bahtiri, ka kërkuar falje publike pas sharjes që bëri në tubimin e mbajtur nga Lëvizja Vetëvendosje në këtë komunë, drejtuar personit që insistoi t’i bënte pyetje Kurtit.
Bahtiri, me anë të ‘Facebook’-ut, ka thënë se reagimi i tij ishte emocional përpara se të ishte personal, teksa ka kërkuar falje për gjuhën e përdorur.
“Reagimi im ishte emocional dhe jo me paramendim, prandaj kërkoj falje publike për fjalorin jo adekuat”, thuhet në postimin e tij. 
Në tubimin në fjalë, një person shkaktoi tollovi pasi insistoi që t’ia parashtronte një pyetje Kurtit, përgjatë kohës sa kandidati për deputet nga radhët e VV’së, Armend Muja, e kishte fjalën.
Mbrojtja e afërt e u.d. të presidentit, personin në fjalë, e kishte nxjerrë nga tubimi.
