Publicisti Bardhyl Mahmuti, përmes një shkrimi në llogarinë e tij në Facebook, ka reaguar në lidhje me disa materiale, që sipas tij, po thirren në burime ndërkombëtare për marrëveshjen Kosovë-Serbi për shkëmbim territoresh.
Duke e quajtur “manipulim të fëlliqtë”, Mahmuti thotë se shkrimi që shoqërohet me një hartë kërkon të krijojë iluzionin sikur Kosova fiton më shumë se sa Serbia me marrëveshjen për shkëmbim të territorit.
Më poshtë, lexoni të plotë shkrimin e publicistit Bardhyl Mahmuti. 
MANIPULIM I FËLLIQTË!
Ditëve të fundit më kanë ardhur mesazhe të cilat gjoja mbështeten në materialet ekskluzive të burimeve të vendimmarrjes ndërkombëtare në bisedimet Kosovë – Serbi.
Për të qenë më bindëse në atë që shpërndahet në emër të “vendimmarrjes ndërkombëtare”, shkrimi shoqërohet edhe me një hartë të territoreve që parashihen “të shkëmbehen me marrëveshje”!
Prezantimi i hartës është bërë me mjeshtri që të krijohet iluzioni se në këtë shkëmbim territoresh gjoja Kosova fiton më shumë se sa Serbia! Këtu kemi të bëjmë me një manipulim të fëlliqtë në funksion të krijimit të një klime të favorshme për t’i dhënë territoret e Kosovës Serbisë dhe për të “marrë” territoret që padrejtësisht janë ndarë prej saj.
P.S. Në këtë rast nuk e përdora termin “i kulluar” ose i “pastër”, sepse nuk ka asgjë të pastër e as të kulluar në këtë manipulim të fëlliqtë!
