Kryeministri Sali Berisha zhvilloi dje në mbrëmje, një takim me zëvendëskryeministren dhe negociatoren e Republikës së Kosovës në Bruksel, Edita Tahiri.
Në takim, siç raporton BW, u diskutua gjerësisht mbi bashkëpunimin rajonal. Kryeministri Berisha mbështeti qëndrimet e qeverisë së Kosovës në negociatat e Brukselit, si një proces shumë i rëndësishëm jo vetëm për Kosovën e Serbinë,
por për të gjithë rajonin. Në takim të dy bashkëbiseduesit u shprehën se problemet në veriun e Kosovës janë probleme të krijuara dhe të manipuluara nga Beogradi. 
Respektimi i marrëveshjeve nga Serbia dhe heqja e strukturave paralele nga veriu i Kosovës është një kusht përcaktues për ecurinë normale të procesit të Brukselit.
Të dy bashkëbiseduesit ndanë të njëjtin mendim se strukturat paralele në veri të Kosovës dhe mosrespektimi i marrëveshjeve nga pala serbe përbëjnë një nga problemet më serioze midis Kosovës e Serbisë, sikundër theksuan se Shqipëria dhe Kosova besojnë se respektimi i kufijve aktualë të jugut të Ballkanit është interesi më i mirë i të gjitha vendeve dhe kombeve të rajonit.
