Nga Shtetet e Bashkuara raportohet se ish presidenti, Xhorxh Bush i vjetri, planifikon ta mbështes Mit Romnin për kandidat presidencial të Partisë Republikane për zgjedhjet e nëntorit.
Gejl Giço, zëdhënëse e Mit Romnit, tha se të dy politikanët do të takohet nesër në Hjuston të Teksasit, për tu paraqitur së bashku para gazetarëve.
Ish presidenti Bush i vjetri i ka ofruar fjalë inkurajuese Romnit gjatë procesit të votimeve nëpër shtete, por tash pritet mbështetja zyrtare. 
E shoqja e zotit Bush, ish zonja e parë e Shteteve të Bashkuara, Barabara Bush, formalisht e ka mbështetur Romnin.
Mbështetja formale nga ish presidenti Xhorxh Bush i vjetri, që ishte presidenti i 41 në Shtetet e Bashkuara, do të tregoj se Partia Republikane është e bashkuar rreth Romnit, ndërsa po rritet presioni ndaj rivalëve të tij, Rik Santorum dhe Njut Gingriç, që të largohen nga gara republikane.
