Greqia po pengon miratimin e paketës së 21-të të sanksioneve të Bashkimit Evropian ndaj Rusisë, për shkak të kundërshtimeve ndaj një mase që synon ndalimin e transportit të gazit natyror të lëngshëm rus drejt vendeve të treta.
Mosmarrëveshja lidhet me kompaninë greke Dynagas, e cila operon anije të specializuara për transportimin e LNG-së në zonat arktike. Athina argumenton se këto anije janë të pajisura me teknologji të avancuar për lundrim në akull dhe nuk mund të përdoren lehtësisht në linja të tjera tregtare.
Sipas palës greke, ndalimi i propozuar do t’i shkaktonte humbje të konsiderueshme kompanisë, e cila operon në një treg shumë të kufizuar dhe specifik. 
Megjithatë, disa shtete të tjera anëtare të BE-së kanë kundërshtuar qëndrimin e Greqisë, duke theksuar se vendosja e sanksioneve ndaj Rusisë ka sjellë kosto ekonomike dhe pasoja për kompani në të gjitha vendet e bllokut.
Përplasja ka vonuar miratimin e të gjithë paketës së re, e cila përfshin masa të tjera ndaj bankave ruse, kompanive të lidhura me industrinë ushtarake dhe kufizime të reja mbi çmimin e naftës ruse.
Sipas Financial Times, kjo çështje ka nxjerrë në pah tensionet brenda Bashkimit Evropian mes përpjekjeve për të shtuar presionin ekonomik ndaj Moskës dhe mbrojtjes së interesave kombëtare nga disa vende anëtare, veçanërisht në sektorët e energjisë dhe transportit detar.
