Pak më shumë së tri javë na ndajnë nga data e zgjedhjeve të parakohshme paralmentare në vend.
Rreth kësaj, kryetari i Drenasit, Ramiz Lladrovci, shumë i përfolur për raportin me PDK-në, ka dhënë një sugjerim në të mirë të partisë.
Lladrovci, ka kërkuar që Partia Demokratike e Kosovës të hapet ndaj figurave që aktualisht nuk janë pjesë e politikës aktive, duke e quajtur këtë një domosdoshmëri përpara zgjedhjeve të 28 dhjetorit. 
Sipas tij, PDK do të forcohej dukshëm me përfshirjen e personaliteteve si Sylejman Selimi, Fatmir Limaj, Rrustem Mustafa, Atifete Jahjaga, Buna Mustafa, Kolë Krasniqi, si dhe Agata e Donika Çetta.
“PDK do të bëhej më e fortë me profilet e Sylejman Selimit, Fatmir Limajt, Rrustem Mustafës, Atifete Jahjagës, Buna Mustafës, Kolë Krasniqit, apo përfshirja e vajzave të Profesor Çettës, Agatës dhe Donikës si dhe personaliteteve tjera për zgjedhjet që na presin”, shkroi Lladrovci në Facebook.
Lladrovci kujton se dikur PDK-ja në Prishtinë kishte dhjetëra profesorë e doktorë shkencash në radhët e saj – një kapacitet që, sipas tij, sot mungon si në parti ashtu edhe në Kuvend.
Ai thekson se Kosova ka nevojë për qartësim të kursit, rikthim te vlerat mbi të cilat është ndërtuar shteti dhe një angazhim serioz për fitore më 28 dhjetor.
