Atmosfera në stadiumin e Drenicës sot u dominua nga një mesazh i qartë dhe i drejtpërdrejtë i tifozëve kuqezi kundër trajnerit dhe njëkohësisht deputetit të Vetëvendosjes, Bylbyl Sokoli.
Në tribunë u shpalos pankarta me mbishkrimin:
“Trajneri na bashkon, nuk na përçan”.
Ky mesazh i fuqishëm nuk ishte përkrahje, por kritikë ndaj Sokolit, të cilin tifozët e akuzojnë se ka sjellë më shumë përçarje sesa unitet brenda klubit. Për një trajner që duhet të jetë figurë bashkuese e ekipit, ky është një sinjal alarmues se besimi ndaj tij është dukshëm i lëkundur.
Drenica, një klub me histori dhe traditë të madhe, po kalon momente të vështira, jo vetëm për shkak të rezultateve, por edhe për shkak të menaxhimit të diskutueshëm nga Sokoli. Tifozët, të cilët gjithmonë kanë qenë zemra e këtij klubi, sot e thanë hapur se nuk e shohin në trajnerin aktual një njeri që po punon për unitetin e skuadrës.
Bylbyl Sokoli, përveç rolit të trajnerit, është edhe figurë politike, gjë që ka shtuar dilemat dhe dyshimet se përkushtimi i tij ndaj futbollit nuk është prioriteti kryesor. Për tifozët e Drenicës, kjo situatë është e papranueshme: ata kërkojnë një trajner që i bashkon, motivon dhe i udhëheq drejt rezultateve, e jo dikë që shkakton ndasi.
Pankarta e sotme ishte një mesazh i pastër: koha e justifikimeve ka mbaruar. Në sytë e tifozëve, Sokoli nuk po arrin ta kryejë misionin që i takon një trajneri të vërtetë.
