Avokati Artan Qerkini, pas bastisjeve të Gjykatës Speciale në shtëpinë e njërit prej eprorëve të lartë të Ushtrisë Çlirimtare të Kosovës (UÇK), Sylejman Selimi, ka thënë se Selimi u intervistua sot nën dyshimet për pengim të drejtësisë.
Sipas Qerkinit, urdhri për bastisje nuk është lëshuar në përputhje me dispozitat ligjore, pasi siç thotë ai nuk mund të cenohet privatësia e një personi nëse nuk e ka statusin e një të dyshuari.
Në një deklaratë për mediat, Qerkini ka thënë se në shtëpinë e Selimit mund të ketë pasur prova të cilat ndërlidhen me procedimet penale të pengimit te drejtësisë. 
“Nuk e ka statusin e personit të dyshuar. Mendohet se në shtëpinë e tij mund të ketë pasur prova, të cilat ndërlidhen me procedimet penale të pengimit të drejtësisë. Ne i kemi disa vërejtje në vetë urdhrin për bastisje”, ka deklaruar Qerkini.
Ai ka thënë se ky nuk është rasti i parë që bastiset një shtëpi e një personi që nuk e ka statusin e një të dyshuari.
Tashmë bastisjet e Gjykatës Speciale në shtëpinë e Sylejman Selimit kanë përfunduar.
