Presidentja e Kosovës, Vjosa Osmani, ka theksuar se siguria në vend garantohet përmes angazhimit të përditshëm dhe partnerëve të besueshëm, duke vënë në pah rolin e KFOR-it dhe bashkëpunimin e ngushtë me NATO-n.
Ajo i bëri këto deklarata përmes një postimi në Facebook, pas një takimi me Komandantin e KFOR-it, Ozkan Ulutas.
Osmani e falënderoi komandantin Ulutaş, siç tha ajo për lidershipin e tij dhe për kontributin e vazhdueshëm të KFOR-it në funksion të sigurisë për të gjithë qytetarët e Republikës së Kosovës, pa dallim. 
Sipas saj, prania dhe angazhimi i KFOR-it mbeten faktorë të rëndësishëm për stabilitetin dhe paqen në vend.
“Siguria garantohet me angazhim të përditshëm dhe partnerë të besueshëm. Në takim me Komandantin e KFOR-it, Ozkan Ulutas, e falënderova për lidershipin e tij dhe për rolin e KFOR-it në funksion të sigurisë për të gjithë qytetarët e Republikës së Kosovës, pa dallim. Bashkëpunimi i ngushtë me NATO-n mbetet thelbësor për ruajtjen e paqes dhe sigurisë në Kosovë e rajon, e në veçanti përballë veprimeve të vazhdueshme destabilizuese të Serbisë”, ka thënë Osmani.
