Kryeministri në detyrë, Albin Kurti, priti një delegacion të Kongresit amerikan, të udhëhequr nga kongresistët Mike Turner dhe Donald Norcross, të cilët janë anëtarë të Asamblesë Parlamentare të NATO-s dhe Komitetit të Shërbimeve të Armatosura të Dhomës së Përfaqësuesve.
Në takimin e mbajtur, u diskutua për thellimin e bashkëpunimit strategjik mes Kosovës dhe Shteteve të Bashkuara, veçanërisht në fushën e mbrojtjes. Kurti theksoi se mbi 1000 pjesëtarë të FSK-së kanë marrë pjesë në trajnime të organizuara nga ShBA, përfshirë akademitë prestigjioze ushtarake, si West Point.
Kryeministri nënvizoi gjithashtu ushtrimet e përbashkëta, duke përmendur pranitë e FSK-së në edicionet e fundit të Defender Europe dhe rolin e Kosovës në stërvitje të rëndësishme, si ajo e Komandës së Divizionit të 28-të të Ushtrisë së ShBA-së në Gjakovë. 
Në fushën e mbrojtjes, Kurti përmendi blerjen e pajisjeve ushtarake amerikane, duke përfshirë sistemet anti-tank Javelin dhe nënshkrimin e Marrëveshjes për Mbrojtjen e Informacionit të Klasifikuar, që i jep Kosovës statusin e besueshëm.
Takimi gjithashtu trajtoi mundësitë e bashkëpunimit ekonomik në fusha si energjia, teknologjia dhe infrastruktura, përfshirë transportin hekurudhor.
Kurti theksoi se orientimi euro-atlantik i Kosovës mbetet i palëkundur dhe se vendi synon anëtarësimin në NATO dhe BE, si një kontribuues në paqen dhe sigurinë e Evropës.
Në fund, ai shprehu mirënjohjen e Kosovës për mbështetjen e vazhdueshme të ShBA-së.
