Kryetari i AAK-së, Ramush Haradinaj, ka zhvilluar një takim me bashkëthemeluesin e Aleancës dhe ish-bashkëluftëtarin e tij, Ahmet Isufi, ku është diskutuar për objektivat strategjikë të partisë dhe orientimin euro-atlantik të Kosovës.
Haradinaj ka rikujtuar bashkëpunimin e gjatë mes tij dhe Isufit, që nga koha e Ushtrisë Çlirimtare të Kosovës e deri te themelimi i AAK-së, duke theksuar se ky partneritet ka qenë i qëndrueshëm gjatë gjithë procesit politik të pasluftës.
Në takim, Haradinaj ka theksuar se Kosova tashmë ka realizuar një prej aspiratave të saj historike, krijimin e ushtrisë, ndërsa synimi i radhës mbetet anëtarësimi në NATO dhe përfundimi i projekteve zhvillimore që, sipas tij, do të çojnë vendin drejt konsolidimit të plotë institucional.
Ai ka deklaruar se partneriteti i tij me Isufin do të vazhdojë në funksion të këtyre synimeve, duke u zotuar se do të qëndrojnë “krah për krah” në proceset politike që i presin.
Takimi u cilësua si riafirmim i bashkëpunimit mes figurave kyçe të AAK-së, në një periudhë ku subjektet politike po intensifikojnë angazhimet e tyre para zgjedhjeve.
