Ish-diplomatja thotë se Serbia ndihet e izoluar për shkak të rreshtimit me Rusinë.
Ish-ministrja e Jashtme e Kosovës, Edita Tahiri, ka reaguar lidhur me deklaratat e presidentit serb Aleksandar Vuçiq për aleancën e mundshme ushtarake mes Kroacisë, Shqipërisë dhe Kosovës, duke thënë se paranoja e tij “nuk ka të ndalur”.
Përmes një deklarimi publik, Tahiri theksoi se Vuçiq realisht po frikësohet nga garancat e sigurisë që Shtetet e Bashkuara të Amerikës dhe ajo që e quajti “Koalicioni i vullnetit të mirë” i vendeve evropiane po i ofrojnë Ukrainës. 
Sipas saj, presidenti serb ndihet i strukur dhe i izoluar për shkak të rreshtimit të tij politik me Rusinë.
“Paranoja e Vuçiqit me aleancën ushtarake Kroaci-Shqipëri-Kosovë nuk ka të ndalur. Ai realisht po frikësohet nga garancat e sigurisë së Amerikës dhe ‘Koalicionit të vullnetit të mirë’ të vendeve evropiane që po i ofrohen Ukrainës, duke u ndjerë i strukur në rreshtimin me Rusinë”, ka deklaruar Tahiri.
Ajo vlerëson se zhvillimet e fundit gjeopolitike po e nxjerrin gjithnjë e më shumë Serbinë në një pozitë të pafavorshme për shkak të qëndrimeve të saj pro-ruse, në një kohë kur shumica e vendeve evropiane po rreshtohen qartë në mbështetje të Ukrainës.
