Kryeministri i vendit, Sali Berisha ka hedhur sërish poshtë akuzat e raportuesit të KiE, Dick Marty, mbi trafikun e organeve njerëzore nga lidershipi i UCK-së.
Në një takim me ish-kryeministrin kosovar Agim Ceku, Berisha është shprehur se lufta e UCK-së ka qenë një nga etapat më të rëndësishme të historisë së Ballkanit.
“Lufta clirimtare e popullit të Kosovës është një nga faqet më të ndritura të lirisë së kombit shqiptar, por edhe të Ballkanit, pasi i dha fund kolonisë së fundit në Europë”, ka deklaruar Berisha. 
Kryeministri ka nënvizuar se pavarësisht se raporti i Marty përmban vetëm trillime të gatuara në Beograd, Shqipëria është e gatshme për cdo hetim që mund të kryhet mbi to.
“Autoritetet shqiptare do t’u garantojnë EULEX-it dhe gjykatës së Hagës të gjithë bashkëpunimin e nevojshëm për të përmbushur me sukses cdo hetim”, ka pohuar Berisha.
“Histeria antishqiptare, e udhëhequr dhe frymëzuar nga Dick Marty, eksponentë të tjerë të racizmit antishqiptar dhe avoketërit e krimeve të Sllobodan Milloshevicit ndaj shqiptarëve në Kosovë, është thjesht një zgjim i demonëve të urrejtjes antishqiptare, e cila është tërësisht pa të ardhme”, ka shtuar ai.(TCH/PrJ)
