Avokati thotë se ka zëra për bartje votash mes kandidatëve të së njëjtës parti dhe kërkon që institucionet të reagojnë.
Avokati Arianit Koci ka deklaruar se në opinion po flitet për një formë manipulimi zgjedhor që, sipas tij, po përmendet gjithnjë e më shpesh: bartja e votave nga një kandidat te një tjetër brenda së njëjtës parti politike.
Sipas Kocit, këto pretendime lidhen me rolin e komisionerëve zgjedhorë, përmes të cilëve dyshohet se po ndodh ky lloj manipulimi. Ai thekson se nuk është hera e parë që në publik dëgjohen akuza për praktika të tilla dhe ngre pyetjen nëse Prokuroria apo Policia do të ndërmarrin veprime për t’i verifikuar këto pretendime. 
Avokati vlerëson se, edhe nëse manipulimi ndodh brenda së njëjtës parti, ai përbën devijim të vullnetit të qytetarëve dhe dëmton besimin në procesin zgjedhor.
Në fund, Koci u ka bërë thirrje qytetarëve që të ndajnë informata konkrete lidhur me këto raste, qoftë përmes komenteve publike apo mesazheve private, në mënyrë që ato të mund të shërbejnë për zbardhjen e së vërtetës.
