Kandidati i LDK-së për kryetar të Komunës së Gjilanit, Arbër Ismajli, së bashku me kandidatin për asamblenë komunale, Fitim Bajrami, kanë vizituar biznesin kreativ “Menakon Creations”, të udhëhequr nga Metush Zymberi dhe Nadire Binaku-Zymberi.
Ismajli vlerësoi lart punën dhe kreativitetin e këtij brendi gjilanas, i cili tashmë është i njohur edhe jashtë vendit. Ai tha se “Menakon Creations” është shembull se si Gjilani ka kapacitet dhe ide të mëdha, të cilave u duhet dhënë hapësirë dhe mbështetje institucionale.
“Ne zotohemi që në qeverisjen tonë të ardhshme lokale, biznese të tilla do ta kenë përkrahjen e plotë, sepse çdo vend i ri pune dhe çdo projekt i suksesshëm është një hap përpara për të ardhmen e Gjilanit,” deklaroi Ismajli. 
Ai shprehu mirënjohje për punën e jashtëzakonshme të ekipit të “Menakon Creations”, duke theksuar se drejtimi i zhvillimit të qytetit duhet të jetë në punësim, perspektivë dhe mbështetje të ideve që gjenerojnë sukses.
