Kandidati i LDK-së për kryetar të Komunës së Gjilanit, Arbër Ismajli, ka zhvilluar një takim me veprimtarë të devotshëm të LDK-së, duke i cilësuar ata si themeluesit e lirisë dhe të shtetit të Kosovës.
Ismajli tha se sakrifica dhe angazhimi i tyre në periudhat më të vështira janë dëshmi se Kosova nuk u ndërtua me fjalë të kota, por me djersë, punë, luftë dhe besim të pathyeshëm.
“Ne kemi obligim moral dhe politik që këtë trashëgimi ta vazhdojmë me përkushtim, ndershmëri dhe vizion të qartë për të ardhmen. Familja jonë politike është forca e historisë sonë, shtylla e Republikës dhe e ardhmja që do t’i japë vendit qeverisjen më të mirë të mundshme,” tha Ismajli.
Ai u zotua se me mbështetjen e qytetarëve dhe me frymën e veprimtarëve, LDK do të rikthejë besimin e qytetarëve në udhëheqjen e Komunës së Gjilanit.
“Është koha e qeverisjes së popullit, e jo e sundimit të pushtetarëve. Vetëm bashkë do ta çojmë deri në fund amanetin për ndërtimin e Gjilanit të ri,” deklaroi Ismajli, duke falënderuar nga zemra përkrahësit e tij për mbështetjen e sinqertë e të palëkundur.
#BashkePerFitore 
#GjilaniPertej
#ArberIsmajli #113
