Kandidati për kryetar të Komunës së Gjilanit nga Lidhja Demokratike e Kosovës (LDK), Arbër Ismajli, ka zhvilluar një takim me banorët e lagjeve Dardania I dhe Dardania II, të cilët u shprehën njëzëri se janë të bashkuar për të ndryshuar mentalitetin qeverisës dhe për t’i kthyer qytetit zhvillimin dhe pasqyrën institucionale që i takon.
“Banorët e Dardanisë dëshmuan edhe njëherë se janë pjesë aktive e zhvillimit të qytetit. Në çdo fjalë të tyre ndjeva dashninë e bekuar që kanë për Gjilanin, por edhe shqetësimin për kaosin urban, për infrastrukturën dhe për projekte që janë premtuar, por nuk janë realizuar,” tha Ismajli.
Kandidati i LDK-së theksoi se qyteti ka nevojë për qasje të re qeverisëse, me më shumë përgjegjësi, planifikim të mirë dhe profesionistë që dinë të udhëheqin me politikat publike.
“Zëri i qytetarëve të Dardanisë është zëri i shumicës së heshtur që kërkon ndryshim të jashtëzakonshëm. Ky ndryshim do të vijë përmes punës, angazhimit, llogaridhënies dhe vizionit tonë për një Gjilan më të zhvilluar dhe me potencial të jashtëzakonshëm zhvillimor,” shtoi ai.
Në fund, Ismajli falënderoi banorët për mikpritjen dhe për shpërfaqjen e nevojave konkrete të projekteve të lagjeve.
“Së bashku me qytetarët e dy Dardanive po e ndërtojmë dhe po e jetësojmë fitoren e madhe të 12 tetorit!” përfundoi kandidati i LDK-së.
