Djali i ish-presidentit të Kosovës, Hashim Thaçi, Endrit Thaçi, ka rishpërndarë në rrjetet sociale thirrjen për protestën gjithëkombëtare që do të mbahet të premten në Tiranë.
Në një postim në llogarinë e tij në Instagram, ai ka shpërndarë thirrjen për protestë, mbi të cilën ka shkruar: “A jeni gati?”
Protesta, e organizuar nga kategoritë e dala nga lufta e Ushtrisë Çlirimtare të Kosovës, ka për qëllim të bëjë thirrje për drejtësi për ish-krerët e UÇK-së që po gjykohen në Hagë.
Në këtë ngjarje pritet të marrë pjesë edhe kryeministri i Shqipërisë, Edi Rama, ndërsa pjesëmarrjen e kanë konfirmuar edhe ish-presidenti shqiptar Alfred Moisiu dhe lideri i BDI-së, Ali Ahmeti.
Protesta do të mbahet në sheshin “Skënderbe” në Tiranë, me fillim nga ora 17:00.
