Kryetari i Prishtinës thotë se do ta ndihmojë partinë vetëm nëse ka nevojë, por përjashton ambiciet për postin e kryetarit.
Kryetari i Prishtinës, Përparim Rama, është pyetur sot nëse do të merrte drejtimin e Lidhjes Demokratike të Kosovës (LDK) në rast se kryetari aktual, Lumir Abdixhiku, do të bëhej president i vendit.
Në përgjigje të pyetjes, Rama tha se fokusi i tij mbetet në drejtimin e kryeqytetit dhe në përmbushjen e mandatit katërvjeçar që i është besuar nga qytetarët. 
“E kam cek edhe më përpara që unë jam kryetar i kryeqytetit. Kam një mandat katërvjeçar. Kemi njerëz të mrekullueshëm përbrenda partisë, të cilët munden me i çu proceset përpara. S’ma merr mendja që kanë nevojë për mua”, u shpreh ai.
Megjithatë, Rama theksoi se është i gatshëm ta ndihmojë LDK-në nëse do të ketë nevojë për kontributin e tij.
“Unë jam këtu për kryeqytetin dhe për qytetarët e kryeqytetit. E kur je për kryeqytetin, je për krejt Kosovën, prandaj do të jem aty në ndihmë për çfarëdo ndihme që do të kenë nevojë, por fokusi im është kryeqyteti”, përfundoi Rama.
