Vezërit Taulant e Granit Xhaka cilësohen si dy prej talenteve më të mëdhenj në futbollin zviceran dhe si lojtarë me të ardhme në përfaqësuese. Megjithatë, helvetikët ndihen të kërcënuar nga Shqipëria, që sipas tyre i ndjek me kujdes lojtarët. Aktualisht ata militojnë te Bazeli, ndërsa kanë luajtur rregullisht me përfaqësueset e moshave të Zvicrës (kjo është një pengesë që ata të vishen kuqezinj), ndërsa vitin e kaluar, Graniti ka fituar edhe Kupën e Botës për U-17. Paraqitjet e mira të Granit Xhakës kanë bërë që FSHF të vihej në lëvizje për 18-vjeçarin. Këtë e pranon edhe vetë mesfushori i ri kosovar. Ai tha: “Është e vërtetë, ka pasur sinjale nga Shqipëria, madje edhe presion në federatë. Zvicra është ëndrra ime. Por, për aq kohë sa nuk do të ketë diçka konkrete, mund ta marr në konsideratë edhe Shqipërinë”.
