Zvicër: shqiptari nga Maqedonia vret gruan dhe të bijën

Gani L. në Einsiedeln , sipas medieve zvicerane ka vrarë vajzën pse kishte dashnor dhe nënën e saj, pse e mbështeste vajzën!
Einsiedel,30 maj

Në Einsiedeln të kantonit Schwyz Gani L., një burrë 56 vjeçar shqiptar nga Maqedonia, ka vrarë gruan 48 vjeçare dhe të bijën 24 vjeçare në mbrëmjen e të shtunës. Pas kësaj, ai ndodhet në arrest, shkruajnë blick.ch, nzz.ch dhe mediat tjera zvicerane.

Sipas të dhënave të policisë, vajza ka vdekur në vend nga plagët e marra, ndërsa gruaja ka ndërruar jetë në natën në mes të të shtunës dhe të dielës në spital, ku ishte bartur me helikopter për shkak të plagëve të rënda.

Prokuroria shtetërore dhe policia kantonale e Schwyzit janë duke i bërë hetimet lidhur me motivin e vrasjeve. Sipas gazetës Blick.ch bëhet fjalë për një “vrasje nderi”, e cila duket të jetë bërë pasi që babai nuk kishte pranuar lidhjen me një djalë, që kishte zgjedhur e bija.

Vajza tashmë e vrarë, ishte studente e pedagogjisë në Universitetin e Lucernit. Babai i saj, bashkë me familjen kishte ardhur në Zvicër para 13 vitesh dhe, siç shkruajnë portalet zvicerane, ushtronte një diktaturë të hekurt në familje.

Sipas fqinjëve të familjes, në banesën ku kanë ndodhur vrasjet ka pasur në vazhdimësi zhurmë dhe zënka. Për këtë arsye familja është vizituar nga policia të mërkurën që kaloi./B.S


Nuk ka komente

Bëhu komentuesi i parë!

Komentoni