Sot në mesditë, Presidenti i Republikës së Shqipërisë, Prof. Dr. Bamir Topi, në krye të delegacionit zyrtar shqiptar, mori pjesë në hapjen e Samitit të 14-të Euro-Aziatik, që po zhvillohet në Stamboll nga data 13-15 prill 2011.
Gjatë punimeve të këtij Samiti të rëndësishëm ekonomiko-politik rajonal Presidenti Topi ndoqi seancën mbi energjinë ku u diskutuan “Bashkëpunimi rajonal dhe çështjet energjitike. Energjia bërthamore. Projektet e ardhshme”, dhe takoi e shkëmbeu pikëpamje me organizatorin dhe Drejtuesin e Forumit të “Marmarasë”, Dr. Akan Suver; me Presidentin e Maqedonisë, Gjorgje Ivanov; me ish-Presidentin e Kosovës, Fatmir Sejdiu si dhe me shumë personalitete të larta si ish-presidentë, ish-kryeministra, ministra dhe përfaqësues të organizatave të ndryshme ndërkombëtare.
* * *
Kryetari i Shtetit shqiptar zhvilloi gjithashtu sot pasdite një vizitë të veçantë në Bashkinë e “Bajram Pashasë” ku u prit me nderime nga Kryetari i Bashkisë, Atila Ajdëner, nga anëtarët e Këshillit Bashkiak, bashkëkombas, si dhe nga qindra banorë e nxënës, shumica e të cilëve valëvisnin flamuj kombëtarë shqiptarë, dhe për nder të Presidentit të Shqipërisë u dha edhe një shfaqje me vallëtarë të veshur me kostume popullore. Në këtë Bashki, e cila mbulon një zonë të Stambollit ka një përqendrim të madh të emigrantëve shqiptarë ndër dekada dhe Bajram Pashai ka bërë binjakëzim me qytetin e Shkodrës si dhe gëzon një bashkëpunim shumë të mirë e të ngushtë edhe me Elbasanin dhe Beratin.
Kryetari i Shtetit shqiptar u nderua me titullin “Qytetar Nderi” i Bashkisë së Bajram Pashasë, pas vendimit unanim të Këshillit Bashkiak, me motivacionin: “Në shenjë nderimi për popullin shqiptar, me të cilin kemi përvoja të përbashkëta në aspektin historik dhe kulturor.” dhe më pas, gjatë një ceremonie solemne, iu dorëzua “Çelësi i Artë i Qytetit”.
Duke shprehur mirënjohjen për këtë nderim të lartë, Presidenti Topi theksoi: “Ju falenderoj nga zemra për këtë mikpritje të veçantë! Dëshiroj t’ju përcjell përshëndetjet më të zjarrta të popullit shqiptar! Populli shqiptar dhe populli turk e kanë farkëtuar miqësinë e tyre historike dhe tradicionale ndër shekuj. Prandaj ndihem shumë i nderuar nga mikpritja vëllazërore në Bajram Pasha, sepse ka në vetvete pjesë nga historia e marrëdhënieve të shkëlqyera mes dy vendeve tona. Ne sot jemi dy vende jo vetëm miq dhe aleatë në NATO, por po përpiqemi të thellojmë dhe zgjerojmë edhe bashkëpunimin ekonomik, siç e demonstron edhe pjesëmarrja në Samitin e 14-të Euro-Aziatik. Edhe një herë ju falenderoj në emër të popullit shqiptar për këtë nderim të veçantë!”.
