RTS-si: Na falni të gjithë për njëanshmërinë në të kaluarën

 

Televizioni shtetëror i Serbisë, RTS, i njohur për raportimet famëkeqe dhe të njëanshme gjatë konflikteve në Ballkan, në vitet e 90-ta, sot ka kërkuar falje te shikuesit, se ishte shfrytëzuar si mjet i propagandës së regjimit gjatë kohës së luftës.

“Me raportimin e ngjarjeve tragjike në vitet e 90-ta, RTS, në shumë raste, i ka lënduar ndjenjat, integritetin moral dhe dinjitetin e shtetasve të Serbisë, të opozitës politike, të gazetarëve, të pakicave etnike dhe fetare dhe të disa popujve dhe shteteve fqinje”, thuhet në deklaratën e Bordit drejtues të RTS-së.

Gjatë pushtetit të ish presidentit të Serbisë, Sllobodan Millosheviq, RTS-ja ishte e njohur për lojalitetin e palëkundur ndaj regjimit të tij, ndërsa shpeshherë kundërshtarët e këtij regjimi cilësoheshin si “tradhtarë” dhe “mercenarë të paguar nga Perëndimi”.

Bordi “kërkon falje nga shtetasit e Serbisë dhe të shteteve fqinje, të cilat ishin objekt i fyerjeve dhe shpifjeve dhe të përmbajtjeve, që sot mund të shihen si gjuhë e urrejtjes”, thuhet në deklaratë.


Nuk ka komente

Bëhu komentuesi i parë!

Komentoni