Rritet numri i azilkërkuesve

Ndonëse zyrtarë të lartë shtetërorë të Republikës së Kosovës insistojnë se numri i azilkërkuesve nga Kosova për në shtetet e Bashkimit Evropian ka shënuar rënie, të dhënat që jep Bashkimi Evropian flasin të kundërtën

Numri i qytetarëve të Republikës së Kosovës, që gjatë vitit 2012 kanë kërkuar azil nëpër shtetet evropiane, ka pasur rritje nëse bëjmë një krahasim ndërmjet muajve të parë të vitit me ata të fundit.

Ndërsa vendi ku ata janë drejtuar më së shumti mbetet Franca, njësoj sikur edhe viteve të kaluara.

Migrimi ilegal dhe ndërprerja e azilkërkuesve është kushti kryesor i Prishtinës, nëse ajo dëshiron të fi tojë liberalizimin e vizave, thotë për “Zërin”, Tove Ernst, zëdhënëse e komisioneres evropiane Michele Malmstrom, e cila merret posaçërisht me emigrimin ilegal në Evropë.

Gazeta ka marrë statistikat nga Eurostat, drejtori kjo e përgjithshme në kuadër të Komisionit Evropian, e cila shpalos statistikat e azilkërkuesve në BE, ku prej 30 shteteve kryesore prej nga vijnë më së shumti azilkërkues në BE, Kosova renditet në 10-shën e parë.

Ajo renditet menjëherë pas Sirisë, Afganistanit, Rusisë, Pakistanit, Somalisë, Iranit, Gjeorgjisë e Irakut. Statistikat tregojnë se në tre muajt e parë të vitit 2012, nga Kosova azil kanë kërkuar në vendet e BE-së 1970 qytetarë.


Nuk ka komente

Bëhu komentuesi i parë!

Komentoni