Prostitutat në Spanjë kanë vendosur të shpallin një grevë të përgjithshme ndaj të gjithë bankierëve, të cilëve do t’u refuzohet shërbimi i tyre deri në lehtësimin e kushteve të marrjes së kredive.

Vajzat eskort, siç quhen ndryshe prostitutat e shërbimit të lartë të specializuara në dërgimet në banesa, shprehin kështu “solidarizimin e tyre me familjet spanjolle në vështirësi”.

Bankierët janë midis klientëve të rregullt të këtyre vajzave dhe ato nuk kanë ndërmend të realizojnë shërbime për ta, deri në ndryshimin e rregullave për marrjen e një kredie, me qëllim që të bëhet më e lehtë për spanjollët e zhytur në borxhe që të marrin hua bankare.

”Ndërsa shumë spanjollë duhet të vuajnë për bukën e gojës, këta bankierë janë në gjendje të paguajnë për një orë shërbim minimumi 300 euro dhe këto janë tarifat më të ulta. Kjo tregon se sektori bankar është i vetmi që nuk është në krizë në këtë vend dhe ne duam të bëjmë tonën për të kontribuar në këtë drejtim”, u shpreh një drejtuese e sindikatës së vajzave eskort.

”Kemi tre ditë që kemi shpallur grevën ndaj bankierëve dhe nuk jam e sigurt nëse ata mund të durojnë edhe shumë kështu”, deklaroi një prostitutë, e identifikuar si Ana M.

SHPËRNDAJE