Në Luginë situatë e paperspektivë

Lideri i Partisë për Veprim Demokratik, Riza Halimi, njëherësh dhe deputet popullor në parlamentin serb, në një konferencë shtypi, mbajtur të hënën, në Preshevë, duke shqyrtuar situatën aktuale që po mbizotëron momentalisht në Luginën e Preshevës, e paraqiti atë të vështirë dhe të paperspektivë.

Ai tha se shqiptarëve të Luginës si e vetmja zgjidhje iu imponua migrimi masiv në drejtim të Kosovës dhe fë shteteve Evropiane, raporton Koha. Andaj sipas tij, është e domosdoshme të sigurohet qasje shumë më serioze e qeverisë serbe, por edhe e bashkësisë ndërkombëtare në zgjidhjen e problemeve shumë të ndjeshme në bazë të programit të veçantë me përkrahje ndërkombëtare.

Halimi, në këtë konferencë shtypi, duke folur për zgjedhjet lokale dhe parlamentare që janë paraparë të mbahen vitin e ardhshëm, theksoi se partia e tij do të marrë pjesë si në zgjedhjet lokale edhe në ato parlamentare.

Në zgjedhjet lokale, theksoi më tej Halimi, PVD do të marrë pjesë sikur deri më tani me listat e veta zgjedhore për pushtetet lokale në Preshevë, Bujanoc dhe Medvegjë, ndërsa për zgjedhjet parlamentare kryesia e PVD-së, ka vendosur theksoi ai, që ti ofrojë subjekteve politike shqiptare paraqitje të përbashkët në kuadër të Koalicionit të Shqiptarëve të Luginës së Preshevës, njësoj si deri më tani do të formohet në bazë të marrëveshjes së përbashkët të subjekteve politike shqiptare. /Telegrafi/


Nuk ka komente

Bëhu komentuesi i parë!

Komentoni