Kreu i LSI-së, Ilir Meta, dhe deputeti Dritan Prifti, do të përballën më datë 26 maj në Gjykatën e Lartë për të vërtetuar pretendimet e tyre apo dhe për të mbrojtur e faktuar akuzat.

Ish zv-kryeministri Meta me anë të përfaqësuesve të tij ligjorë i ka kërkuar gjykatës se larte pavlefshmërinë e videos së regjistruar nga ish-ministri Dritan Prifti me 10 mars 2010 në ministrinë e Ekonomisë.

Një trup gjykues i Gjykatës së Lartë e shqyrtoi kërkesën e avokatëve mbrojtës në një seancë që zgjati për më shumë se 3 orë.

Meta ka kërkuar nga Gjykata e lartë shfuqizimin e vendimit të prokurorisë së përgjithshme që ka marrë si provë video-përgjimin duke ngritur kështu një akuzë penale ndaj tij.

Avokatët e Metës kanë pretenduar me këtë kërkesë-padi se kjo video nuk mund të konsiderohet si provë, pasi ajo nuk është marrë në kushtet e kërkuara nga ligji.

Gjykata pasi dëgjoi palët, vendosi që kërkesa e avokatëve do të shqyrtohet nga i njëjti trup gjykues që pritet të shqyrtojë në datë 26 maj çështjen e themelit, atë të akuzës që prokuroria ka ngritur ndaj Metës.

Do të jetë i njëjti trup gjykues që do të vendosë të pranojë ose jo kërkesën e Metës për të shfuqizuar përdorimin e videos si provë.

Nëse kjo ndodh, automatikisht gjykata e lartë nxjerr të pa vlerë vendimin e Prokurorisë së Përgjithshme për të dhe gjithë aktet e tjera që burojnë nga video-përgjimi.

SHPËRNDAJE