Majko, grekëve: Njiheni Kosovën!

Dhjetëra faqe interneti dhe blogje të ndryshme greke kanë ripublikuar artikullin e ish-kryeministrit shqiptar Pandeli Majko që përbënte editorialin e faqes së parë të gazetës elektronike politike “Metarithmisi” në numrin e saj të djeshëm.
Shkrimi i Majkos, i pari ekskluzivisht për shtypin grek, është një përgjigje dhe një replikë ndaj artikullit të ish-ambasadorit grek në Shqipëri dhe këshilltarit Aleksandros Malias për çështjet ballkanike në 2005 pranë ministres së jashtme Bakojanis, të botuar në të njëjtën gazetë, rreth një muaj më parë me titull “Greqia dhe shqiptarët, fqinjët e saj”.

Majko që titullon analizën e tij me pyetjen retorike latine “Shqipëria dhe Greqia quo vadis?” për të kuptuar tashmë çdokush se çfarë ndodh në realitet mes Greqisë dhe Shqipërisë, bie dakord në faktin që thekson edhe diplomati grek se marrëdhëniet politike midis dy vendeve janë në një gjendje statike dhe amullie, madje i konsideron ato se kanë arritur në një pikë të vdekur, raporton TCH.

Gjithashtu ai nuk kundërshton edhe faktin se qëndrimet e politikanëve grekë dhe shqiptarë në marrëdhëniet dypalëshe kanë qenë të karakterizuara në shumicën e rasteve nga dyshimi, pasiguria, kameleonizmi madje dhe arroganca.

Por rrënimi ekonomik i Greqisë, krijimi i shtetit të dytë shqiptar në rajon, Kosovës, anëtarësimi i Shqipërisë në NATO, çështja pezull e emrit të Maqedonisë, fuqizimi i Kroacisë, roli i Serbisë dhe “zbarkimi” ekonomik i Turqisë krijon sipas Majkos një realitet krejt tjetër gjeopolitik në Ballkan dhe nevojën e një diplomacie konkrete.

Ish-kryeministri i Shqipërisë thekson se faktori shqiptar është tashmë një nga më të rëndësishmit në rajon, kështu që vonesa e njohjes së pavarësisë së Kosovës nga Athina si dhe qëndrimi i ngurtë me Shkupin për emrin duke mënjanuar shqiptarët si aktorë të çështjes, veçohen si gabime politike të Athinës, e cila duhet të modernizojë sa më shpejt politikat e saj të jashtme që janë kaq anakronikë përsa u përket fqinjëve.

Me shqiptarët nuk duhet folur me gjuhën e “sirenave”, shkruan Majko që shprehet se “maqedonizimi” i marrëdhënies së Greqisë me Shqipërinë nuk mund të jetë zgjidhja e së ardhmes së marrëdhënieve dypalëshe mes Athinës dhe Tiranës.

“Ne duam apo nuk duam, i duhemi njëri-tjetrit më shumë se sa e kundërta sepse vërtet grekët janë kombi që lindi “politikën”, por edhe shqiptarët janë fqinjët e tyre më të vjetër”, përfundon Majko.


Nuk ka komente

Bëhu komentuesi i parë!

Komentoni