Lind ideja për këmbimin Guardiola-Luiz

Rinovimi i Guardiolës me Barcelonën është duke u vonuar dhe arsyeja e vërtetë mund të quhet Roman Abramovich.

Sipas mediave sportive spanjolle, presidenti miliarderi i Chelsea është i çmenduar pas trajnerit spanjoll dhe po përpiqet të përfitojë nga situata, duke ndjekur politikën e vetme që di të bëjë, atë të bërjes së ofertave të parefuzueshme.

Në fakt, Abramovich duket se i ka propozuar Guardiolës një kontratë 4-vjeçare me vlerë totale prej 40 milionë euro ose dhjetë milionë në sezon. Aktualisht, tek Barça trajneri fiton tetë milion euro në vit, por paketa e vërtetë tunduese nuk është paga, por një “çek i bardhë” në merkato, ku ai do të ketë dorë të lirë dhe shuma të pakufizuara për të blerë cilin lojtar të dëshirojë.

Ndërkohë, në Spanjë raportohet edhe për lindjen e një interesimi gjithmonë e më të fortë të kampionëve të Europës në fuqi për qendërmbrojtësin e anglezëve, David Luiz, i konsideruar si një zëvendësues ideal i kapitenit Carles Puyol në të ardhmen.

Ndonësë braziliani konsiderohet një titullar fiks në “Stamford Bridge”, spekulimet e para përflasin se të dy klubet mund të diskutojnë për një marrëveshje këmbimi “kokë më kokë”, që do të dërgonte Guardiolën në Londër dhe futbollistin 24-vjeçar në “Camp Nou”.


Nuk ka komente

Bëhu komentuesi i parë!

Komentoni