Intelektualët shqiptarë i shkruajnë letër Klintonit

Një grup intelektualësh shqiptar përmes një letre drejtuar Sekretares amerikane të shtetit Hillary Klinton, kërkojnë anëtarësimin e Maqedonisë në NATO në Samitin e Çikagos. Ata u bëjnë thirrje autoriteteve në Uashington të ndërmarrin diçka në këtë drejtim pasi në të kundërtën Maqedonisë i kanoset rreziku nga destabilizimi i gjendjes së sigurisë.
Qeveria tani gjashtë vite ka bllokuar integrimin euro-atlantik, gjë që shtetin e ka sjellë në prag të një destabilizimi me përmasa të mëdha. Shqiptarët vite me radhë patën mirëkuptim ndaj emocioneve kolektive të bashkë-atdhetarëve të tyre etnik maqedonas, të cilët çështjen e emrit e përjetonin ndjeshëm. Por, durimi u shterr prej atij momenti kur u bë e qartë se senzibilizimi negativ lidhur me emrin e shtetit nga ana e qeverisë paraqet vetëm formë manipulimi me ndjenjat e qytetarëve, me qëllim të vazhdimit të jetës së pushtetit aktual – në kushte të varfërisë, diktaturës dhe kriminalitetit të organizuar. Ju lutemi të ndërmerrni të gjitha veprimet që mundeni që definitivisht të ofrohet çfarëdo qoftë zgjidhje e pranueshme në mes Greqisë dhe Maqedonisë që më në fund në samitin e radhës shteti të anëtarësohet në NATO ”, thuhet ndër të tjera në letrën e cila i është dërguar edhe Sekretarit të përgjithshëm të NATO-s, Andres Fog Rasmusen dhe Komisionarit për zgjerim të BE-së, Shtefan Fyle.
Intelektualët shqiptar vlerësojnë se problemi i emrit të Maqedonisë është shumë më i vogël se sa që dramatizohet nga udhëheqësit e saj me qëllime të caktuar. Kompromiset Kroaci – Slloveni dhe Kosovë – Serbi, treguan se edhe në situata shumë më të komplikuara dhe të ndjeshme politike mund të ketë zgjidhje nëse ekziston vullnet i mirë politik. Intelektualët gjithashtu shprehin shqetësimin nga politikat populiste dhe totalitare siç i cilësojnë ata të kryeministrit Gruevski, i cili harxhon mjete të mëdha financiare për ta reklamuar veten dhe për të manipuluar me emocionet e qytetarëve, duke u krijuar atyre një histori dhe lumturi të rrejshme.
“Një politikë e tillë për gjashtë vite dyfishoi borxhin e jashtëm dhe shumëfishoi atë të
brendshëm, pa ndërtuar asnjë projekt relevant, pos atij të improvizuar “Shkupi 2014”.Kushtet e jetesës këtu dukshëm janë keqësuar, kurse si rezultat i manipulimit me marrëdhëniet ndëretnike gjendja e sigurisë në vend tej masë është acaruar. Kontrolli totalitarist ndaj mediave, gjykatave dhe administratës publike tani më ka marrë përmasa dramatike”.
Firmosësit e kësaj letre janë Mersel Bilalli, Xhevdet Hajredini, Hasan Jashari, Albert Musliu, Ismet Ramadani, Naser Zyberi, Flora Kadriu, Abedin Zymberi, Zeqirja Idrizi, Bashkim Selmani, Afrim Osmani dhe Sami Bislimi.


Nuk ka komente

Bëhu komentuesi i parë!

Komentoni